Të dy ekipet nga Tetova që garojnë në Ligën e Parë të Maqedonisë së Veriut në futboll, kampioni aktual Shkëndija dhe Renova pasi kanë kryer testet nga sindikata e futbollistëve për Covid-19, disa nga ta kanë rezultuar të jenë pozitiv. Dy futbollistë janë nga kampi i Shkëndijës dhe katër të tjerë nga skuadra e Renovës.
Mësojmë se janë thirrur takime urgjente në të dy klubet për këtë pasdite. Në faqen zyrtare të Sindikatës së futbollistëve në Maqedoni, konfirmuan shkurtimisht se ka raste pozitive në të dy klubet.
“Fatkeqësisht, nuk kemi lajme të mira sot. Pas testeve të djeshme në dy klubet e Tetovës, KF Renova dhe KF Shkëndija, kemi raste pozitive të Covid-19. Për fat të keq, pas analizave të përsëritura në laboratorin e “Acibaden Sistina”, kemi raste pozitive. Prandaj, stërvitjet e sotme të këtyre dy klubeve u anuluan. Emrat e të infektuarve janë dorëzuar në KF Renova dhe KF Shkëndija gjatë ditës. Ka katër pozitive në kampin e KF Renova dhe dy në kampin e KF Shkëndija. Nesër do të vazhdojmë të testojmë skuadrat e tjera nga ligat e para të Maqedonisë”, thuhet në komunikatën e Sindikatës së futbollistëve të Maqedonisë.
Sigurisht se këto raste do të jenë të diskutueshme tani edhe në FFM, pasi që pak ditë më parë u dha dritë jeshile që kampionati të fillojë në mesin e qershorit, ndërsa stërvitjet grupore po vazhdojnë tani më gati një javë.
