Nga data 12 maj 2020, e martë, xhamitë do të jenë në shërbim të xhematit. Kështu ka vendosur Rijaseti i Bashkësisë Fetare Islame në mbledhjen e jashtëzakonshme të mbajtur mbrëmë. Nga BFI njoftojnë se një vendim i tillë vjen pas vlerësimit se numri i të infektuarve nga Kovid 19 është më i ulët, pastaj pas kërkesës së 13 muftinive, të cilat janë të bazuara në kërkesat e xhemateve dhe të indinjuar nga veprimet e pakujdesshme të Kishës Ortodokse Maqedonase, që siç theksojnë nga BFI i ka nxitë besimtarët islamë.
Bashkësia Fetare Islame
“Nga data 12 maj 2020, e martë, xhamitë do të jenë në shërbim të xhematit për të kryer obligimet fetare kolektive. Vendimi hyn në fuqi nga data e sjelljës së tij. Vlenë të potencohet se gjatë tërë kohës së pezullimit të namazeve me xhemat në xhami, BFI-ja me të gjitha organet dhe institucionet edukativo-arsimore të saja, në përpikëshmëri u është përmbajtur rekomandimeve të institucioneve relevante për mbrojtjen e shëndetit të popullatës, edhe pse të vetëdijshëm për pasojat e veta.“
Nga Bashkësia Fetare Islame shpresojnë që vendimi i Rijasetit të gjejë mirëkuptimin e organeve kompetente shtetërore.
Bashkësia Fetare Islame
“Po ashtu, Bashkësia Fetare Islame ka qenë i vetmi institucion fetar në vend, që publikisht ka kërkuar nga besimtarët islamë që t`u përmbahen rekomandimeve për ruajtjen e shendetit, edhe pse për këtë askush nga organet kompetente nuk dha ndonjë vlerësim pozitiv për BFI-në, por, përkundrazi disa qarqe të afërta me pushtetin, vazhdimisht e sulmonin BFI-në dhe kreun e saj. Shpresojmë se ky vendim i Rijasetit do të gjejë mirëkuptimin e organeve kompetente shtetërore.”
Kujtojmë se Bashkësia Fetare Islame më 17 mars vendosi për pezullimin faljeve të namazave në mënyrë kolektive në xhami, si masë mbrojtëse nga përhapja e koronavirusit.
