Liderët e dy partive më të mëdha politike, Zoran Zaev i LSDM-së dhe Hristijan Mickoski i VMRO-DPMNE-së, prej sot janë në izolim të obligueshëm shtëpiak, kumtoi sot në konferencë për shtyp ministri i Shëndetësisë, Venko Filipçe.
Ai sqaroi se pas informatës, të cilën e ka marrë Ministria e Shëndetësisë, se një gazetar nga një medium televiziv është pozitiv në virusin Kovid-19, i cili gjatë javës së kaluar ka pasur intervista me Zaevin dhe Mickoskin, të dy janë testuar.
“Rezultati i Mickoskit, i cili është përpunuar mbrëmë vonë, është negativ, por ai do të jetë në vetizolim të obliguar 14 ditë nga kontakti i fundit me të infektuarin. Në këtë moment nuk ka nevojë për anketa të posaçme epidemiologjike. Rezultati i liderit të LSMD-së, Zaev, duke marrë parasysh se ai mbrëmë veçmë kishte shkuar në Strumicë, do të jetë gati gjatë ditës së sotme, por edhe ai menjëherë pas informatave është vendosur në izolim shtëpiak”, tha Filipçe.
Gazetari është në gjendje stabile shëndetësore dhe gjendet në mjekim në spitalin “8 Shtatori”.
