Në mëngjes janë regjistruar 26 raste të reja të koronavirusit në vend, gjithsej 285 pacientë diagnostikuar. Ka vdekur një pacient, ndërsa nëntë janë shëruar dhe janë lëshuar nga spitali, publikoi në profilin e tij në Fejsbuk ministri i Shëndetësisë, Venko Filipçe.
“Në mëngjes në Klinikën për sëmundje infektive dhe gjendje fibrile në Shkup, ka vdekur një pacient 79-vjeçar nga Dibra. Pacienti u diagnostikua pozitiv në KOVID-19 më 23 mars, ndërsa me gjendje të përkeqësuar shëndetësore u hospitalizua në Klinikën në Shkup më 25 mars”, ka shkruar Filipçe.
Nga Klinika për sëmundje infektive dhe gjendje fibrile në Shkup, janë lëshuar nëntë pacientë (tetë nga Dibra dhe një nga Shkupi) të cilët në dy testet kontrolluese nga KOVID-19 kanë pasur rezultate negative. Gjendja e tyre shëndetësore është e mirë dhe ata shkuan në shtëpi.
“Gjatë 24 orëve të kaluara janë regjistruar 26 raste të reja të koronavirusit në vend. Raport të tërësishëm për gjendjen nëpër qytete do të dërgojmë në mënyrë shtesë, pasi një pjesë nga rastet e konfirmuara janë me punë në Shkup, ndërsa me vendbanim në qytet tjetër, ndërsa anketat janë ende në vijim. Me këtë numri i përgjithshëm i pacientëve të diagnostikuar me KOVID-19 në vend sot deri ora 12:00 është 285 persona”, ka shkruar ministri Filipçe në Fejsbuk
