Komisioni Shtetëror për Parandalimin e Korrupsionit ka miratuar sot planin vjetor për kontrollin e gjendjes së pasurisë dhe interesave për vitin e ardhshëm 2021, që do të realizohet në tri kuartale dhe ku do të përfshihen kryetarë komunash, gjykatës dhe funksionarë te tjerë qeveritarë. Kryetarja e Komisionit, Biljana Ivanovska, sqaroi se bëhet fjalë për kritere të përpunuara objektive në të cilat do të përfshihen të gjithë gjykatësit, kryetarët e komunave dhe funksionarëve për të cilët qytetarët kanë dorëzuar ankesa, pas çka do të bëhen seleksionime dhe do të publikohen.
BILJANA IVANOVSKA
“Në kuartalin e parë, në prag të zgjedhjeve lokale do të përfshihen 15 kryetarë komunash dhe kryetari i Qytetit të Shkupit. Nuk mund t’i përfshijmë të gjithë, prandaj do të bëjmë ndonjë seleksionim varësisht nga mjetet që do i kemi në dispozicion”
Në kuartalin e dytë ajo tha se do të përfshihen gjykatësit, mes të cilëve edhe dy kryetarë gjykatash që nuk ishin prekur vitin e kaluar, ndërsa në kuartalin e tretë do të përfshihen funksionarët qeveritarë, që është edhe obligim nga GREKO. Në seancën e sotme, Komisioni Shtetëror për Parandalimin e Korrupsionit, e shqyrtoi dhe miratoi edhe programin vjetor për punë për vitin 2021. Katica Nikollovska, duke sqaruar programin tha se për realizimin e tij është e nevojshme që Kuvendi sa më shpejtë të miratojë strategjinë kombëtare për luftë kundër korrupsionit.
KATICA NIKOLLOVSKA
“Në program janë përfshirë aktivitete të të gjitha reparteve dhe sektorëve të komisionit. Procedim i rrjedhshëm sipas denoncimeve, si dhe rritje e bashkëpunimit me organizatat joqeveritare dhe të gjitha institucionet. Më pas, implementim i ligjit për mbrojtje të denoncuesve dhe fuqizim të kapaciteteve të Komisionit”
Anëtarët e Komisionit Shtetëror për Parandalimin e Korrupsionit kanë miratuar edhe strategjinë për menaxhim me rreziqe 2021-2023 dhe planin vjetor për furnizime publike, ku më së shumti mjete janë paraparë për softuerin e ri dhe rikonstruimin e hapësirave.
