Përmes një akademie solemne Universiteti i Tetovës shënoi 25-vjetorin e themelimit. Në prani të zyrtarëve të lartë të universitetit, politikanëve, kreut të Kuvendit, Talat Xhaferi, stafit akademik dhe studentëve, rektori Vullnet Ahmeti tha se 25 vjet pas themelimit, Universiteti i Tetovës është shndërruar në një institucion që prodhon kuadro intelektuale dhe të përgatitura për tregun e punës, shënon rezultate të larta në nivel kombëtar dhe ndërkombëtar, ndërsa mbështet një numër të madh të studentëve të shkëlqyeshëm përmes bursave të plota.
Kryetari i Kuvendit, Talat Xhaferi tha se Universiteti i Tetovës është ngritur me sakrificën e shumë shqiptarëve, profesorëve dhe studentëve të vendosur. Ky tempull i diturisë, tha Xhaferi, dëshmon dashurinë e madhe të një populli për dije dhe arsimim.
Në këtë akademi ju nda titulli honoris kauza aktorit të madh Mirush Kabashi.
Para objektit të rektoratit sot u shpalos edhe shtatorja e themeluesit dhe rektorit të parë të Universitetit të Tetovës, Fadil Sulejmani, ndërsa delegacione të universitetit dhe figura publike bënë homazhe tek varri i tij dhe tek varri i dëshmorit të UT-së, Abdylselam Emini.
