Shoqatat “Qyteti i bletëve” dhe “Mjalti i Pollogut”, organizuan mbledhjen e mjaltave për të qenë pjesë e paketave për ndihmë që i organizon Komuna e Tetovës për të prekurit nga tërmeti katasrofal në Shqipëri.
Kësaj thirrje iu bashkëngjit dhe Shoqata e bletarëve “Matica” nga Shkupi e cila dhuroi 22 kg mjaltë, të cilët e falënderojmë publikisht për këtë bashkëpunim.
Gati 200 kg mjaltë u ngarkua tani në karavanin i cili u nis për Shqipëri.
Faraoni i Egjiptit, Nemruti ndezi një zjarr të madh për ta djegur profetin Ibrahim a.s. Mes tyre që shpejtuan ta fikin zjarrin ishte edhe milingona që mbarte nga një pikëz ujë.
Ku po shkon e pyetën milingonën.
Shkoj të fik zjarrin e Nemrutit.
A nuk e sheh se sa i madh është zjarri i Nemrutit, është e pamundur ta fikësh me atë pikëz ujë – i thanë.
Milingona u përgjigj me qetësi:
– E di se nuk do të fiket, por së paku me këtë pikëz ujë tregoj në anën e cilit jam.
Dhe ne sot jemi me ata që më së shumti kanë nevojë. Dhimbja dhe humbja e tyre është dhimbje dhe humbje edhe për ne.
Dyert e të gjithë bletarëve të Maqedonisë janë të hapura për gjithë ato të cilët kanë nevojë.
Faleminderit i veçantë për çdo bletarë që mbështeti këtë aksion.
