Kryeministri Zaev pret Albin Kurtin në Qeveri (FOTO)

Kandidati për kryeministër i Kosovës, Albin Kurti, ka realizuar një vizitë të pa paralajmëruar sot në Shkup ku është pritur nga kryeministri I Maqedonisë së Veriut, Zoran Zaev, në kabinetin e tij në Qeveri. I shoqëruar nga anëtarët e kryesisë, znj. Fitore Pacolli-Dalipi dhe z. Liburn Aliu, Kurti njofton se kanë biseduar për situatën politike në dy vendet, mundësitë e bashkërendimit të ndërsjelltë, raportet midis shteteve në Ballkan dhe çështjet e integrimit evropian. Do të mbetemi në komunikim të vazhdueshëm për takime e bashkëpunime në të ardhmen, ka shkruar Kurti në faqen e tij zyrtare në Facebook ku ka njoftuar për vizitën e sotme në Shkup. Pas përfundimit të zgjedhjeve parlamentare në Kosovë, Kurti pati paralajmëroi se Maqedonia e Veriut do të jetë ndër vendet e para të cilat do t’i vizitojë dhe me kryeministrin Zoran Zaev do të bisedojë për intensifikimin e bashkëpunimit mes dy vendeve. Ai tha se në mesin e planeve të Qeverisë së ardhëshme do të jetë edhe ndërtimi i dy rrugëve dhe hapja e dy pikave të reja kufitare, një mes Tetovës dhe Prizrenit dhe tjetra mes Kumanovës dhe Gjilanit.