Kryetari i Komisioni Shtetëror të Zgjedhjeve, Oliver Derkovski, ka deklaruar sot se janë të gatshëm që të zbatojnë zgjedhjet parlamentare të 12 prillit me modelin e listave të hapura, nëse partitë politike dakordojnë një marrëveshje të tillë. Para prezantimit të raportit për monitorimin e zgjedhjeve presidenciale të zbatuar nga ana e vëzhguesve me nevoja të veçanta, Derkovski tha se KSHZ-ja është e gatshme të zbatojë zgjedhjet sipas asaj që do të dakordohen partitë politike, pavarësisht nëse zgjedhjet organizohen me lista të hapura dhe se ky institucion do të zbatoj çfarëdo lloj ndryshimi në kodin zgjedhor. I pyetur nëse është për një model të tillë zgjedhor, ai tha se mendimi tij rreth kësaj nuk është relevant, pasi është diçka për të cilën duhet të vendosin partitë politike.
Oliver Derkovski, KSHZ
“Ne si Komision Shtetëror Zgjedhor funksionojmë në kontinuitet dhe jemi të gatshëm të zbatojmë çfarëdo lloj marrëveshje të partive. Mendimi im në të vërtetë nuk është relevant, sepse ajo megjithatë është marrëveshje e partive politike dhe si do që të dakordohen, institucioni ynë ashtu do t’i përgjigjemi. Jemi të gatshëm për gjithçka”
Duke folur për listën zgjedhore, Derkovski informoi se vazhdimisht punohet në përpunimin e saj dhe se nuk ka votues fiktiv, ndërsa parregullsitë që kanë ekzistuar më herët, janë reduktuar në një kornizë të arsyeshme, siç është shprehur ai.
Oliver Derkovski, KSHZ
“Në kontinuitet e them se lista zgjedhore është në rregull, nuk ka votues fiktiv se është materie që vazhdimisht pastrohet dhe përpunohet. Kuptohet se, në një listë në të cilën ka mbi 1,8 milonë votues mund të gjindet ndonjë parregullsi, por gjithë ajo është reduktuar në një kornizë të arsyeshme. Ne vazhdimisht punojnë edhe në këtë moment kur është periudhë e zbrazët dhe nuk ka zgjedhje, punojmë në pastrimin e Listës Zgjedhore”
Ndërkohë, i pyetur rreth votimit të diasporës, Derkovski është përgjigjur se ky komision do të dëshironte të ketë ndryshime, por në kuadër të mundësimit të mënyrave të reja për votim, në mënyrë që të kursehen mjete financiare. (Shenja)
